नवी दिल्ली : भाजपाने चार प्रमुख राज्यांच्या प्रदेशाध्यक्षांची अधिकृतपणे घोषणा केली आहे. हर्ष मल्होत्रा यांची दिल्लीत, तर अर्चना गुप्ता यांच्याकडे हरयाणाची सूत्रे सोपवण्यात आली आहेत. याशिवाय, सरदार केवल सिंह ढिल्लन यांची पंजाब भाजप अध्यक्ष आणि अभिषेक देवरा यांची त्रिपुरा भाजप अध्यक्ष म्हणून नियुक्ती करण्यात आली आहे.
केवल सिंह ढिल्लन हे पंजाबमधील बरनाला मतदारसंघात एक सुप्रसिद्ध नाव आहे. ते दोनदा आमदार म्हणून निवडून आले आहेत. २०२२ मध्ये, त्यांनी भाजपचे उमेदवार म्हणून संगरूर लोकसभा पोटनिवडणूक लढवली होती. त्यानंतर, २०२४ च्या बरनाला विधानसभा पोटनिवडणुकीतही भाजपने त्यांच्यावर विश्वास व्यक्त केला होता. त्यांच्या राजकीय पार्श्वभूमीव्यतिरिक्त, केवल सिंग ढिल्लन हे पंजाब आणि देशातील अग्रगण्य उद्योगपतींपैकी एक म्हणूनही ओळखले जातात. माजी मुख्यमंत्री कॅप्टन अमरिंदर सिंह यांच्याशी असलेल्या त्यांच्या जवळीकीची बऱ्याच काळापासून चर्चा होत आहे. बरनाला भागातील लोक त्यांना विकासावर लक्ष केंद्रित करणारे नेते म्हणून पाहतात. त्यांचे राजकीय लक्ष नेहमीच परिसराचा विकास आणि पायाभूत सुविधा सुधारण्यावर राहिले आहे.
दिल्लीची या नेत्यावर दिली जबाबदारी
दिल्ली भाजपची सूत्रे आता हर्ष मल्होत्रा यांच्या हाती सोपवण्यात आली आहेत. पक्ष नेतृत्वाने मोठे संघटनात्मक बदल करून त्यांची दिल्ली प्रदेशाध्यक्षपदी नियुक्ती केली आहे. हर्ष मल्होत्रा हे मागील अनेक वर्षांपासून भाजप आणि आरएसएसशी संबंधित आहेत. दिल्लीच्या राजकारणात ते एक प्रभावी संघटनात्मक व्यक्तिमत्व मानले जातात.
हरयाणाची जबाबदारी दिली या नेत्यावर
डॉ. अर्चना गुप्ता भाजप संघटनेत मागील अनेक बऱ्याच वर्षापासून सक्रिय आहेत. महिला मोर्चाशी संबंधित पक्षाच्या अनेक मोहिमा आणि कार्यक्रमांमध्ये त्यांनी महत्त्वाची भूमिका बजावली आहे. हरयाणातील महिला सक्षमीकरण आणि सामाजिक समस्यांवरील त्यांच्या सक्रियतेची पक्षात वारंवार चर्चा झाली आहे. यामुळेच केंद्रीय नेतृत्वाने त्यांच्यावर विश्वास दाखवून राज्याच्या नेतृत्वाची जबाबदारी त्यांच्यावर सोपवली.
